Tugon kay Nataniel

Juan 1:46-51

kaylan matitigil
mga kabalbalan
sino ang susupil
sa katiwalian?

sukat na sa yabang
singtaas ng langit
mahirap,mayaman
ang puso ay ganid.

bakit pumapatay
bakit nagnanakaw
bakit sinungaling
bakit nanlalamang?

D'yan ba sa Nazareth
ay may pusong wagas
dayong kasama mo
dalisay ang hangad?

..................

ikaw si Nataniel
matuwid at tapat
sa lilim ng igos
katulad mo'y sinag-

kislap na sisilip
sa kumpol ng dahon
hinagis na bit'win
sa lupang may lilom.

halika't sumunod
upang masaksihan
pagbukas ng langit
sa sangkatauhan

at manhik-manaog
mga anghel ng Diyos
sa langit, sa lupa
na aking tahanan

hindi magtatagal
walang maiiwan
ni isa mang imbi
pusong makalaman.